Participación social
Traballamos coa comunidade para que as persoas con diversidade funcional teñan voz, participen e vexan recoñecidos os seus dereitos.
O que nos move
Máis oportunidades. Máis porvir.
Un proxecto empresarial cunha idea moi humana: que todas as persoas teñan a oportunidade de participar.
Desde a Costa da Morte
Facer ben o traballo.
Facer ben á comunidade.
Máis Porvir Xestión Social é un Centro Especial de Emprego de iniciativa social e sen ánimo de lucro, impulsado pola Asociación Íntegro.
Prestamos servizos de atención ás persoas e servizos auxiliares a empresas e organizacións. Co noso traballo buscamos crear oportunidades de inclusión laboral para as persoas con diversidade funcional.
As persoas, primeiro.
A nosa maneira de facer
Os nosos valores
Así queremos relacionarnos coas persoas, co equipo e coa comunidade.
Defensa de dereitos
Acompañamos as persoas para protexer os seus intereses, reforzar a súa capacidade de decidir e avanzar con autonomía.
Igualdade
Todas as persoas teñen os mesmos dereitos e merecen as mesmas oportunidades, sexa cal sexa a súa orixe, sexo ou situación persoal.
Mellora continua
Revisamos os servizos, os procesos e a nosa maneira de traballar para aprender e ofrecer unha atención cada vez mellor.
Compromiso social
Poñemos o traballo ao servizo das persoas. Queremos desenvolver capacidades e crear oportunidades que melloren a súa vida e a da comunidade.
Transparencia
Xestionamos os recursos con responsabilidade e claridade, respectando a confianza das persoas e entidades que nos acompañan.
Misión
Que o emprego abra portas.
Promover a inclusión laboral das persoas con diversidade funcional desde un Centro Especial de Emprego de iniciativa social e sen ánimo de lucro. Traballamos tanto na inserción laboral como na sensibilización social: crear oportunidades e axudar a que a comunidade recoñeza as capacidades de cada persoa.
Visión
Un futuro con máis posibilidades.
Construír na Costa da Morte un camiño de inserción laboral adaptado a cada persoa. Queremos que as empresas coñezan mellor o seu talento e as súas aptitudes, e que os apoios e a adaptación ao posto faciliten unha participación real no mercado laboral ordinario.
Para entendernos mellor
Que é un CEE?
CEE significa Centro Especial de Emprego. É unha empresa que produce bens ou presta servizos e que ten unha finalidade social: ofrecer emprego remunerado a persoas con discapacidade e favorecer a súa inclusión no mercado laboral ordinario.
Como requisito xeral, polo menos o 70 % do persoal debe ser persoas con discapacidade. Neste cálculo non se inclúe o persoal sen discapacidade dedicado aos servizos de axuste persoal e social.
Definición e requisitos dos CEEE que significa «de iniciativa social»?
Que o proxecto pon as persoas por diante do capital e reinviste os beneficios na súa finalidade social. Máis Porvir é un CEE de iniciativa social, sen ánimo de lucro e impulsado pola Asociación Íntegro. A nosa cualificación publicada é 145 CG.
Contratar un servizo axuda a crear oportunidades?
Si. A actividade dos servizos sostén o proxecto de emprego e inclusión. Cando unha familia, empresa ou entidade traballa con Máis Porvir, participa nunha iniciativa de economía social.
Quero traballar en Máis Porvir. Como contacto?
Podes enviarnos o teu currículo a [email protected] e contarnos a túa experiencia e os teus intereses. As candidaturas e a dispoñibilidade de postos consúltanse directamente co equipo.
Empresas que tamén suman
Que son as medidas alternativas?
As empresas públicas e privadas con 50 ou máis persoas traballadoras deben reservar polo menos o 2 % dos postos para persoas con discapacidade. Nos supostos excepcionais previstos na normativa, poden solicitar o cumprimento mediante medidas alternativas.
Para aplicalas, a empresa debe solicitar previamente a declaración de excepcionalidade e as medidas propostas ao servizo público de emprego competente. Contratar un servizo non substitúe automaticamente a obriga de reserva.
Contratos de bens ou servizos
Contratar cun CEE ou cunha persoa autónoma con discapacidade o subministro de bens necesarios para a empresa ou servizos alleos e accesorios á súa actividade habitual.
Importe anual mínimo: 3 veces o IPREM anual por cada persoa con discapacidade que se deixe de contratar por debaixo da cota.
Doazóns e patrocinio
Achegas económicas a fundacións ou asociacións de utilidade pública que desenvolvan formación, inserción laboral ou creación de emprego para persoas con discapacidade.
Importe anual mínimo: 1,5 veces o IPREM anual por cada persoa con discapacidade que se deixe de contratar por debaixo da cota.
Enclaves laborais
Constituír un enclave laboral mediante un contrato cun CEE, nas condicións previstas na normativa que regula esta medida.
Importe anual mínimo: 3 veces o IPREM anual por cada persoa con discapacidade que se deixe de contratar por debaixo da cota.
Se a túa empresa quere coñecer a opción de contratar servizos de Máis Porvir, podemos falar sobre o traballo que necesitas e a proposta de colaboración.
Consultar unha colaboraciónA nosa Unidade de Apoio
Acción social: o apoio tamén conta
A Unidade de Apoio acompaña as persoas do noso equipo na incorporación, na permanencia e no seu desenvolvemento laboral. O obxectivo é identificar e superar as barreiras que poidan atopar, cunha atención persoal e adaptada.
O apoio social e psicolóxico abrangue a autonomía, as relacións, o benestar emocional e a orientación ás familias. No traballo, tamén se acompañan a organización das tarefas, a xestión do tempo e as habilidades dixitais.
Apoio social e psicolóxico
- Entrevistas individuais e detección de necesidades.
- Intervención psicolóxica, social e familiar.
- Obradoiros individuais e de grupo.
- Información sobre prestacións e recursos sociais.
- Habilidades para a autonomía persoal.
- Xestión emocional, autoestima e autocoidado.
Preparación e orientación laboral
- Acompañamento na incorporación e adaptación ao posto.
- Observación e seguimento no lugar de traballo.
- Apoio no desempeño das tarefas e na xestión do tempo.
- Habilidades sociais e de comunicación.
- Formación en competencias técnicas e dixitais.
- Orientación para o desenvolvemento profesional.
A atención ás persoas forma parte do proxecto de emprego. Non remata ao incorporarse a un posto: continúa para apoiar a participación, a autonomía e o progreso de cada persoa.
O coidado tamén está nos detalles.
Consulta a información sobre o noso sistema de calidade.
O seguinte paso? Falamos.
Cóntanos que necesitas. Buscaremos como axudarche.